PROPOSITIO XV.

Si ab angulis quatuor solidis pyramidis triangulae totidem lineae descendant in centra singulae oppositarum basium, omnes quatuor se invicem in uno puncto, quod centrum est pyramidis secabunt, itaut portiones earum a centro ad angulos receptae sint triplae reliquarum singulae singularum: contra, si ab angulis pyramidis per centrum quatuor lineae ducantur productae in centra oppositarum basium cadent.

Prima pars huius patet, quoniam unaquaeque huiusmodi linearum, per 13. antepraemissam, incedit per centrum pyramidis, et sic secatur ut portio a centro ad angulum suscepta tripla sit reliquae; altera vero propositionis pars sequitur ex praecedenti 14. quasi corollarium.